မေမေတို့ရေ …
🤱 မိခင်နို့တိုက်ကျွေးခြင်း အလေ့အကျင့်ဟာ နိုင်ငံအပေါ်၊ နေရပ်အပေါ်မူတည်ပြီး ကွဲပြားမှု မရှိပါဘူးနော်။
🤱 ကမ္ဘာ့ကျန်းမာရေးအဖွဲ့ကြီးနဲ့ အခြားသော နိုင်ငံတကာမှ ကျန်းမာရေးအဖွဲ့အစည်းများဟာ မွေးစမှ အသက် (၆) လအထိ ရင်သွေးငယ်များကို မိခင်နို့တစ်မျိုးတည်းသာ တိုက်ကျွေးဖို့ တညီတညွတ်တည်း တိုက်တွန်းထားကြတာပါ။
❤️🩹 ဘာကြောင့်လဲ?
ရင်သွေးငယ်လေး မိခင်ဝမ်းကနေ မွေးလာချိန်ကစလို့ အသက် (၆) လအထိ လိုအပ်တဲ့ အာဟာရဓာတ်၊ ရေဓာတ်တွေဟာ မိခင်နို့မှာ ရာနှုန်းပြည့် အပြည့်အဝ ပါပြီးသားမို့ပါ။ ဒါ့အပြင် မွေးပြီး ပထမ (၃) ရက်အတွင်း ထွက်တဲ့ နို့ဦးရည်မှာ ကလေးရဲ့ ခုခံအားကို ကောင်းမွန်စေတဲ့၊ ကူးစက်ရောဂါတွေကနေ ကာကွယ်ပေးတဲ့ ပဋိဇီဝပစ္စည်းတွေ ပါဝင်ပါတယ်။ ဒါကြောင့် မွေးမွေးချင်း မိခင်နို့ကို စောနိုင်သမျှ စောစောတိုက်ကျွေးခြင်း ခံရတဲ့ကလေး၊ မိခင်နို့ တစ်မျိုးတည်းကိုသာ အသက် (၆) လအထိ တိုက်ကျွေးခံရတဲ့ ကလေးတွေဟာ အခြားသော ကလေးတွေထက် ပိုမိုကျန်းမာပြီး ဉာဏ်ရည်ဖွံ့ဖြိုးကြတာဖြစ်တယ်လို့ သုတေသနများစွာက ဖော်ပြထားပါတယ်။
အသက် ၆-လမပြည့်သေးတဲ့ ကလေးငယ်လေးတွေရဲ့ အူလမ်းကြောင်းနဲ့ ကျောက်ကပ်တို့ဟာ ကောင်းစွာ ဖွံ့ဖြိုးကြီးထွားခြင်း မရှိသေးပါဘူး။ ရင်သွေးလေးရဲ့ နုနယ်သေးတဲ့ ကိုယ်တွင်းအင်္ဂါတွေကို မငဲ့ကွက်ဘဲ မေမေတို့က ပြင်ပမှ ရေနဲ့ အရည်တွေကို စိတ်တိုင်းကျ တိုက်ကျွေးလိုက်မယ်ဆိုရင် အဲဒီ ရေနဲ့ အရည်တွေမှာပါတဲ့ သာမန်မျက်စိနဲ့ မမြင်နိုင်တဲ့ ရောဂါပိုးမွှားတွေဟာ ရင်သွေးငယ်လေးရဲ့ အူလမ်းကြောင်းကို ဒုက္ခပေးတဲ့အတွက် ဝမ်းပျက်ဝမ်လျှောရောဂါတွေ အလွယ်တကူ ဖြစ်ပွားစေပါတယ်။ မိခင်နို့ကတော့ အဲလို ရောဂါပိုးမွှားအန္တရာယ်တွေ ကင်းစင်တဲ့အပြင် ကလေးဆာတဲ့ အချိန်တိုင်း ပိုးသတ်စရာ မလို၊ ဆေးကြောစရာမလိုဘဲ အမြဲအဆင်သင့် တိုက်ကျွေးနိုင်မှာ ဖြစ်ပါတယ်။
မေမေတို့ရဲ့ နို့သီးခေါင်းမှာ ကပ်ငြိနေတဲ့ ပိုးမွှားတွေဟာ ကောင်းမွန်တဲ့ ပိုးမွှားတွေ ဖြစ်တဲ့အတွက် ရင်သွေးငယ်အတွက် အစာခြေဖျက်ရာမှာ အထောက်အကူပြုပါတယ်။ ဒါကြောင့် မိခင်နို့ မတိုက်ကျွေးမီ မေမေတို့ရဲ့ နို့သီးခေါင်းကို ဆေးကြောသန့်စင်စရာတောင် မလိုအပ်ပါဘူး။ ရေချိုးတဲ့အချိန်မှာပဲ နို့သီးခေါင်းကို ပုံမှန်သန့်ရှင်းရေးပြုလုပ်သွားရင် လုံလောက်ပါပြီ။
နောက်ပြီး အရည်ဓာတ်လွန်ကဲရင် နုနယ်သေးတဲ့ ရင်သွေးလေးရဲ့ ကျောက်ကပ်မှာ အရည်ဓာတ်ကို အလွယ်တကူ မစွန့်ထုတ်နိုင်ဘဲ ဒဏ်ပိနိုင်ပါတယ်။ မေမေတို့ တိုက်ကျွေးဖို့ ပြင်ဆင်တဲ့ ပြင်ပ အရည်တွေထဲမှာ ဟင်းခတ်မှုန့်၊ ဆားတို့သာ ပါဝင်မယ်ဆိုပါက ရင်သွေးလေးရဲ့ ကျောက်ကပ်ကို ပျက်စီးစေနိုင်တဲ့အထိ အန္တရာယ်ကြီးပါတယ်။ ဒါဟာ ပြင်ပမှ အရည်တိုက်ကျွေးလို့ရတဲ့ အန္တရာယ်ပဲ ရှိပါသေးတယ်။
အကယ်၍ မေမေတို့က စေတနာပိုပြီး ရင်သွေးငယ်လေးကို အသက် (၆) လမပြည့်ခင် အခြားအစာတွေ အဖတ်တွေပါ စတင်ကျွေးလိုက်မယ်ဆိုရင်တော့ ရင်သွေးလေးရဲ့ နုနယ်တဲ့ အူလမ်းကြောင်းဟာ အူလှိုင်းလှုပ်ရှားမှု ကောင်းစွာ မလုပ်ဆောင်နိုင်တဲ့အတွက် ထိုအစာကို အူလမ်းကြောင်းတစ်လျှောက် သယ်ပို့ရန်၊ စွန့်ထုတ်ရန် အခက်အခဲ ရှိနိုင်ပြီး အူစွပ်ခြင်း၊ အူကျွံခြင်းများ ဖြစ်ပွားနိုင်ပါတယ်။
အခုလောက်ဆိုရင် မွေးစကနေ အသက် (၆) လအထိ ရင်သွေးငယ်များကို ဘာကြောင့် မိခင်နို့တစ်မျိုးတည်း တိုက်ကျွေးဖို့ရာ လိုအပ်လဲ၊ အရေးကြီးသလဲဆိုတာ မေမေတို့ နားလည်သဘောပေါက်လိမ့်မယ်လို့ မျှော်လင့်ပါတယ်။
👉 ကလေးအသက် (၆) လအထိ သဘာဝအတိုင်းရတဲ့၊ သန့်ရှင်းလတ်ဆတ်တဲ့၊ ငွေကုန်ကြေးကျ လုံးဝမရှိတဲ့ မိခင်နို့တစ်မျိုးတည်းကိုပဲ တိုက်ကျွေးပြီး မိမိရင်သွေးလေး အာဟာရပြည့်ကျန်းမာအောင် ပျိုးထောင်မလား?
👉 မလိုအပ်ဘဲ ငွေကုန်ကြေးကျခံ အပြင်စာတွေ တိုက်ကျွေးပြီး ရင်သွေးငယ်လေးတွေကို အန္တရာယ်ဖြစ်စေမလား?
အဖြေက ရှင်းရှင်းလေးပဲ ဖြစ်ပါတယ်။
ဒါကြောင့်
✅ မွေးစကနေ အသက် (၆) လအထိ ရင်သွေးငယ်လေးတွေကို မိခင်နို့ တစ်မျိုးတည်းကိုသာ တိုက်ပါ။
✅ မွေးပြီးပြီးချင်း စောနိုင်သမျှ စောစော မိခင် နို့ဦးရည်ကို တိုက်ပါ။
✅ မိခင်နို့ကို ကလေး ဆာတိုင်း တိုက်ပါ၊ ကြာကြာ တိုက်ပါ၊ ခဏခဏ တိုက်ပါ။
ကျန်းမာရေးဝန်ကြီးဌာန၊ အမျိုးသားညီညွတ်ရေးအစိုးရ
References:
- https://www.who.int/news/item/15-01-2011-exclusive-breastfeeding-for-six-months-best-for-babies-everywhere#:~:text=These%20advantages%20include%20a%20lower,allergic%20diseases%20have%20been%20demonstrated.
- https://www.unicef.org/parenting/food-nutrition#breastfeeding
- https://www.cdc.gov/breastfeeding/data/facts.html#:~:text=The%20U.S.%20Dietary%20Guidelines%20for,for%201%20year%20or%20longer.
- https://www.unicef.org/parenting/food-nutrition/feeding-your-baby-when-to-start-solid-foods
- https://www.researchgate.net/publication/324108002_Pediatric_Ileocolic_Intussusception_Caused_by_Introducing_Solid_Food_Before_6_Months_Old_A_Case_Report
- https://www.usatoday.com/story/news/factcheck/2023/03/01/fact-check-drinking-water-unsafe-babies-under-6-months-old/11375902002/
#nugmoh #breastfeeding
Ministry of Health,
National Unity Government.
Published on: November 9, 2023
Last updated: November 9, 2023