Mindfulness “အသိသတိ ရှိရှိနဲ့ ပစ္စုပ္ပန်မှာ နေထိုင်ရှင်သန်ခြင်း”

“အသိသတိ ရှိရှိနဲ့ ပစ္စုပ္ပန်မှာ နေထိုင်ရှင်သန်ခြင်း”

လူမှန်ရင် ဒုက္ခနဲ့မကင်းတာမှန်တာမို့ ဘဝမှာ ခံစားကြုံတွေ့ရသမျှကို အဲဒီခဏမှာ အသိသတိ အပြည့်ကပ်ပြီး တည့်တည့် ချဉ်းကပ်ကိုင်တွယ်နိုင်ဖို့လိုပါတယ်။

အတိတ်ဟာ ကုန်လွန်ခဲ့ပြီးတဲ့အရာဖြစ်ပြီး အနာဂတ်ဟာ မရောက်လာသေးတဲ့အရာဖြစ်တာမို့ အမှန်ကြုံတွေ့နေရတဲ့ အခုပစ္စုပ္ပန်ကို အလေးထား ကိုင်တွယ်ရမှာပါ။ အတိတ်နဲ့ အနာဂတ်ကြောင့် ဖြစ်ပေါ်ခံစားရတဲ့ စိုးရိမ်သောကဟာ ကောင်းကျိုးချမ်းသာ မဆောင်ကြဉ်းပေး နိုင်ရုံသာမက တွေဝေတွန့်ဆုတ်မှု၊ ကြောက်ရွံ့တုန်လှုပ်မှုနဲ့ အားငယ်ဒေါသဖြစ်ရမှုတွေကို ပိုမို ဖြစ်ပေါ်ခံစားရစေတတ်ပါတယ်။

ဒါကြောင့် မိမိရဲ့ကိုယ်စိတ်နှစ်ပါး သာယာချမ်းမြေ့ဖို့အတွက် မိမိရဲ့ အတိတ်နဲ့အနာဂတ်ဆီက လွတ်မြောက်ပြီး ပစ္စုပ္ပန်တည့်တည့်မှာ ရှင်သန်နေနိုင်ဖို့ လိုအပ်ပါတယ်။ ပစ္စုပ္ပန်တည့်တည့်ကို ရှုနိုင်ဆင်ခြင်နိုင်တဲ့အခါ၊ ဖြစ်ပျက်ပြောင်းလဲနေတဲ့စိတ်အစဉ်ကို အရှိအတိုင်းလက်ခံပြီး သိမြင်ထိန်းကျောင်းနိုင်တဲ့အခါ၊ အပြုအကောင်းစေ့ဆော်မှုတွေကို ရွေးထုတ်ယူနိုင်တဲ့အခါနဲ့ ဖြန့်ကျက်အသုံးချနိုင်တဲ့အခါတွေမှာ မိမိရဲ့စိတ်အစဉ်ကို ပိုပြီး ချမ်းမြေ့သာယာလျက်ရှိအောင်လည်း စီမံလာနိုင်မှာ ဖြစ်ပါတယ်။

အသိသတိရှိရှိ ရှင်သန်တယ်ဆိုတာ ကိုယ့်ရဲ့အတွေး၊ စိတ်ခံစားချက်နဲ့ ခန္ဓာကိုယ်ပေါ် သက်ရောက်လာတဲ့ အာရုံခံစားမှုတွေကို ဓမ္မဓိဌာန်ကျကျသိမြင်နေတာ၊ ဝေဖန်ပြစ်တင်တာမျိုး မလုပ်ဘဲ အရှိအတိုင်းကို လက်ခံရင်ဆိုင်တာမျိုးကို ခေါ်ပါတယ်။

အဲဒီလို အသိသတိကပ်ဖို့ နည်းလမ်းအများကြီး ရှိတဲ့အထဲမှာမှ ဝင်လေထွက်လေမှတ်ခြင်းဟာ လူအသုံးများတဲ့ နည်းလမ်းတစ်ခု ဖြစ်ပါတယ်။ တစ်ယောက်ချင်းစီအနေနဲ့ အသိသတိ ကပ်ထားနိုင်ဖို့အတွက်ကိုတော့ ကိုယ်နဲ့အသင့်တော်ဆုံး နည်းလမ်းတစ်ခုခုကို အသုံးပြုရမှာ ဖြစ်ပါတယ်။ လေ့လာမှုတွေအရ အသိသတိကပ်ဖို့အတွက် အလွယ်ကူဆုံး နည်းလမ်းနှစ်သွယ် ရှိပါတယ်။

၁။ ပထမနည်းလမ်းကတော့ ‘အာရုံစူးစိုက်မှုကို မြှင့်တင်ခြင်း’ ဖြစ်ပါတယ်။

မိမိကိုယ်ခန္ဓာနဲ့ မိမိရဲ့ပတ်ဝန်းကျင်မှာ ဖြစ်နေရှိနေတဲ့ အရာတစ်ခုခုအပေါ် အာရုံစူးစိုက်ထားရင်းနဲ့ မိမိရဲ့ အသိသတိကို အားကောင်းနေအောင် လုပ်ဆောင်တာမျိုးဖြစ်ပါတယ်။ လူတစ်ယောက်အဖို့ နေ့စဉ်နေ့တိုင်း မဖြစ်မနေလုပ်ဆောင်ရတဲ့ အသက်ရှူတာ၊ ရေသောက်တာနဲ့ အစာစားတာတို့လို ကိစ္စရပ်တွေကနေစပြီး အာရုံစူးစိုက်မှုအားကောင်းလာအောင် လေ့ကျင့်ကြည့်လို့ရပါတယ်။

👉 ရေသောက်တဲ့အခါ သောက်တဲ့ရေ၊ ရေခွက်နဲ့ လည်ချောင်းတစ်လျှောက် ရေစီးဝင်သွားတာ၊ ရေသောက်နေတဲ့အချိန်မှာ ကြမ်းပြင်နဲ့ ထိတွေ့နေတဲ့ ခြေထောက်ရဲ့ ခံစားချက်စတာတွေကို အာရုံစူးစိုက်ထားတာမျိုးပေါ့။

၂။ ဒုတိယနည်းလမ်းကတော့ ‘စိတ်အာရုံကို ဖြေလျှော့ထားခြင်း’ ဖြစ်ပါတယ်။

ဒီနည်းမှာကတော့ မိမိရဲ့ စိတ်ကို သက်သောင့်သက်သာဖြေလျှော့ထားပြီး လွတ်လပ်စွာ စီးမျောနေစေရင်း စိတ်မှာကြုံရသမျှ၊ ပေါ်လာသမျှကို မှတ်နေကာ ကိုယ့်ရဲ့ အသိသတိကို အားကောင်းလာအောင် မပင်မပန်းဘဲ လုပ်ဆောင်တာမျိုး ဖြစ်ပါတယ်။ ဒီနည်းမှာက တစ်ခုခုကို အထူးတလည် အာရုံစူးစိုက်ဖို့ ကြိုးစားတာရမျိုးမရှိပါဘူး။ လက်ရှိအချိန်၊ လက်ရှိနေရာမှာ ဖြစ်ပျက်ကြုံတွေ့ရသမျှကို အသိသတိ ကပ်နိုင်ဖို့ပဲ လုပ်ဆောင်ရပါတယ်။

အဲဒီလို လေ့ကျင့်အားထုတ်ရင်း အသိသတိကပ်တဲ့ အလေ့အကျင့်အားကောင်းလာပြီဆိုရင် ကိုယ်စိတ်နှစ်ပါး ကျန်းမာရေးအတွက် ရှေ့ဆက်လုပ်ဆောင်လို့ ရနိုင်တာတွေ အများကြီး ဖြစ်လာမှာပါ။

👉 ကိုယ့်စိတ်ကို ညစ်ညူးစေတဲ့ အတွေးတွေ၊ အားလျော့စေတဲ့ အတွေးတွေ တွေးမိနေတာမျိုးကို ထိန်းကျောင်းနိုင်လာပါမယ်။
👉 စိတ်ခံစားမှုတွေ မတည်မငြိမ်ဖြစ်နေခဲ့ရင် စိတ်တည်ငြိမ်အောင် လုပ်ဆောင်နိုင်လာပါမယ်။
👉 အနာဂတ်နဲ့ ပတ်သက်တဲ့ စိုးရိမ်ပူပန်မှုတွေ ဖြစ်ပေါ်နေခဲ့ရင် ဖြေလျှော့နိုင်လာပါမယ်။
👉 အတိတ်ဆီကရုန်းမထွက်နိုင်ဘဲ တအုံနွေးနွေး နာကျင်ခံစားရမှုတွေ ရှိနေခဲ့ရင် ကုစားနိုင်လာပါမယ်။
👉 ဘဝရဲ့ နိမ့်မြင့်လောကဓံတွေကို ယခင်ကထက်ပိုပြီး သိမြင်လာတာမို့ ပိုပြီးတည်တည်ငြိမ်ငြိမ် တုံ့ပြန်နိုင်လာစေပါမယ်။

ကိုးကား
၁) psychologytoday.com/sg/basics/mindfulness
၂) http://tinyurl.com/two-paths-mindfulness

ကျန်းမာရေးဝန်ကြီးဌာန၊ အမျိုးသားညီညွတ်ရေးစိုးရ (NUG)
https://moh.nugmyanmar.org/

International Society of Myanmar Scholars and Professionals
https://ismsp-mm.org/

NUG ကျန်းမာရေးဝန်ကြီးဌာနသို့ လှူဒါန်းရန်-

https://moh.nugmyanmar.org/donate/

စိတ်ကျန်းမာရေးပြဿနာများနှင့် စိတ်ပိုင်းဆိုင်ရာအခက်အခဲများကို အခမဲ့ (အခမဲ့) (အခမဲ့) တိုင်ပင်ဆွေးနွေးနိုင်ရန်-

🎗 တယ်လီကျန်းမာ အခမဲ့ အွန်လိုင်းဆေးခန်း (Daily 8 am to 6 pm)
https://facebook.com/telehealthmm

🎗 တိုင်ပင်ဖော် ဝန်ဆောင်မှု
https://facebook.com/taingpinphaw

🎗 Mind Healers -စိတ်ခွန်အားပေးသူများ
https://facebook.com/MindHealersMM

Ministry of Health,

National Unity Government.

Published on: 1 July 2022
Last Updated: 1 July 2022