သားအိမ်အလုံးတည်ခြင်း

အမျိုးသမီးတို့ သတိပြုဖို့ “သားအိမ်အလုံးတည်ခြင်း” 𝐅𝐢𝐛𝐫𝐨𝐢𝐝𝐬 (𝒍𝒆𝒊𝒐𝒎𝒚𝒐𝒎𝒂 𝒐𝒓 𝒎𝒚𝒐𝒎𝒂) အကြောင်း….

ဘွားဘွား၊ ဒေါ်ဒေါ်၊ မမ၊ ညီမလေးတို့အားလုံး သတိပြုသင့်တဲ့ Uterine Fibroids “သားအိမ်အလုံးတည်ခြင်း” အကြောင်းကို တယ်လီကျန်းမာက မျှဝေပေးလိုပါတယ်။

“သားအိမ်အလုံးတည်ခြင်း” ဆိုတာ အမျိုးသမီးများရဲ့ သားအိမ်မှာ ချောမွေ့တဲ့အသားပိုအလုံး တွေ့ရှိရခြင်းကို ခေါ်ပါတယ်။ သားအိမ်အလုံးဟာ ပဲစေ့အရွယ်ကစလို့ အရွယ်အစားအမျိုးမျိုး တွေ့ရတတ်ပါတယ်။ သားအိမ်အတွင်းပိုင်း၊ သားအိမ်နံရံပေါ်၊ သားအိမ်နံရံရဲ့အပြင်ဘက် စတဲ့နေရာတွေမှာ အလုံး တည်တတ်ပါတယ်။

သားအိမ်မှာ အလုံးတည်ရတဲ့အကြောင်းအရင်းတွေက ဘာတွေလဲ

• သားအိမ်ထဲမှာ ဘာလို့ဒီလိုအလုံးတည်ရသလဲဆိုတဲ့အဖြေ အတိအကျမရှိပါဘူး။

• ဒါပေမယ့် သွေးဆုံးချိန်မှာ သားအိမ်အလုံးတွေ ကျုံ့သွားတာ၊ ထပ်မံမကြီးထွား‌တော့တာတို့ကို တွေ့ရတဲ့အတွက် Sex Hormones တွေ (အထူးသဖြင့် Oestrogen နဲ့ Progesterone) တို့နဲ့ ဆက်စပ်နေတယ်လို့ ဆိုနိုင်ပါတယ်။

• ကိုယ်ဝန်ဆောင်ချိန်မှာလည်း သားအိမ်အလုံးရဲ့အရွယ်အစား ကြီးမားလာတတ်ပါတယ်။

• အပျိုဖော်မဝင်သေးတဲ့ အမျိုးသမီးများမှာ‌တော့ ဖြစ်လေ့ဖြစ်ထသိပ်မရှိပါဘူး။

သားအိမ်အလုံးတည်ခြင်းနဲ့ပတ်သက်တဲ့ ယေဘုယျ သိမှတ်ဖွယ်ရာတွေက ဘာတွေလဲ

• အသက် ၃၅နဲ့ ၄၅ နှစ်ကြား အမျိုးသမီးတွေမှာ အဖြစ်များပြီး၊ အသက် ၄၀ ကျော်အမျိုးသမီးတွေရဲ့ ၄၀% ကျော်မှာဖြစ်လေ့ရှိပါတယ်။

• အများစုက လက္ခဏာပြလေ့မရှိပါဘူး။

• သားအိမ်အလုံးတည်သူ အမျိုးသမီးအယောက် 800 မှာ တစ်ယောက်ကသာ ကင်ဆာဖြစ်နိုင်ခြေ တွေ့ရှိရပါတယ်။

ရောဂါလက္ခဏာတွေ

သားအိမ်အလုံး အရွယ်အစားပေါ်မူတည်ပြီး

• ဓမ္မတာချိန်မှာ ပုံမှန်ထက် ‌ရာသီသွေးပမာဏများပြားစွာဆင်းတာ

• ဓမ္မတာရက်ရှည်တာ

• ဓမ္မတာ ပြီးသွားသည့်တိုင် ဓမ္မတာရက် မဟုတ်တဲ့ ကြားရက်တွေမှာ သွေးဆင်းတာ

• ဓမ္မတာလာနေစဉ်မှာ နာကျင်ကိုက်ခဲတာ

• လိင်ဆက်ဆံချိန်မှာ နာကျင်တာ

• တင်ပါးဆုံရိုးတဝိုက် နာကျင်တာ (နောက်ကျော၊ ဝမ်းဗိုက်၊ ဆီးခုံနေရာတွေမှာ လေးလံနေတာ)

• ဝမ်းဗိုက်အောက်ပိုင်း လေပွသလို ဖောင်းနေတာ

စတာတွေ ခံစားရလေ့ရှိပါတယ်။

နောက်ဆက်တွဲ ဆိုးကျိုး

• မျိုးဆက်ပွားဖို့ ခက်ခဲတာ

• သွေးအားနည်းတာ

• ခါးလှည့်ချိန်တွေမှာ နာကျင်တာ

• ကိုယ်ဝန်ပျက်ကျနိုင်တာ

• မီးဖွားရာမှာ အခက်တွေ့တာ စတာတွေ ဖြစ်တတ်ပါတယ်။

သားအိမ်မှာ အလုံးတည်/မတည်ကို ဘယ်လိုစစ်ဆေးကြမလဲ

• Ultrasound အာထရာဆောင်းရိုက်တာ၊

• Hysteroscopy သားအိမ်အတွင်း မှန်ပြောင်းဖြင့်ကြည့်တာ

• သွေးစစ်တာ

• Biopsy အသားစစစ်ဆေးတာတွေ ပြုလုပ်နိုင်ပါတယ်။

ကုသနိုင်မယ့်နည်းလမ်းတွေက ဘာတွေလဲ

• သားအိမ်အလုံးက ကြီးကြီးမားမား လက္ခဏာမပြသေးရင် သေချာစောင့်ကြည့်ပေးဖို့လိုပါတယ်။

• ၆ လတစ်ကြိမ် (သို့မဟုတ်) ၁ နှစ်တစ်ကြိမ် စမ်းသပ်စစ်ဆေးသင့်ပါတယ်။

• ဟော်မုန်းဆေးတွေ ပေးနိုင်တဲ့အပြင် သားအိမ်အလုံးကို ခွဲထုတ်ပစ်လိုက်တာ၊ မှန်ပြောင်းကြည့်ပြီး ဖယ်ထုတ်တာ (hysteroscopic resection)၊ သားအိမ်တစ်ခုလုံး ထုတ်တာ (hysterectomy)၊ သားအိမ်အလုံးဆီ သွေးစီးဆင်းမှု ရပ်တန့်သွားစေဖို့ သားအိမ်သွေးကြောကို ပိတ်လိုက်တာ (Uterine Artery Embolization) စတာတွေနဲ့ ကုသဖယ်ရှားနိုင်ပါတယ်။

ခုလောက်ဆို သားအိမ်အလုံးတည်ခြင်းအကြောင်း အခြေခံဗဟုသုတ ရရှိကြမယ်လို့ မျှော်လင့်ပါတယ်။

” အမျိုးသမီးများ သားအိမ်အလုံးတည်ခြင်းမှ ကင်းဝေးနိုင်ကြပါစေ ”

Reference

Murtagh,J , 2016. Murtagh’s patient education. 6th Ed. Australia:Mcgraw-Hill Australia,pp.82.

NUG, MOH တယ်လီကျန်းမာ ၊ လူတိုင်းအတွက်ပါ

တယ်လီကျန်းမာတွင် ဆရာဝန်များနှင့် အွန်လိုင်းမှ အခမဲ့တိုင်ပင်ဆွေးနွေးနိုင်ပါသည်။

ပိတ်ရက်မရှိပါ ( နေ့စဥ် မနက် ၈နာရီမှ ညနေ၆နာရီအထိ )

*** ကုသမှုအားလုံး အခမဲ့ ဖြစ်ပါသည် ***

ကြိုတင်ဘိုကင်ယူရန်အတွက် ( https://m.me/telehealthmm )ကိုနှိပ်ပါ။

ချက်ချင်းဆေးခန်းပြရန်အတွက်( https://t.me/TelehealthMM )ကိုနှိပ်ပါ။

ကျန်းမာရေးဝန်ကြီးဌာန၊

အမျိုးသားညီညွတ်ရေးအစိုးရ

  ထုတ်ဝေသည့်နေ့စွဲ -- ၅ ဇူလှိုင် ၂၀၂၂
နောက်ဆုံးမွမ်းမံသည့်နေ့စွဲ --- ၅ ဇူလှိုင် ၂၀၂၂