“World Health Day” (April 7, 2024)

ကမ္ဘာ့ကျန်းမာရေးနေ့၊ ၂၀၂၄ ခုနှစ်
World Health Day 2024

၂၀၂၄ ခုနှစ်၊ ဧပြီလ (၇) ရက်

ကမ္ဘာတစ်ဝန်းတွင် လူသန်းပေါင်းများစွာ၏ ကျန်းမာရေးဆိုင်ရာအခွင့်အရေးကို ပိုတိုး၍ ခြိမ်းခြောက်ခံနေရသည်။ ရောဂါဘယနှင့် ကပ်ဘေးအန္တရာယ်များသည် သေဆုံးမှုနှင့် မသန်မစွမ်းဖြစ်မှု၏ ကြီးမားသော အကြောင်းရင်း ဖြစ်လျက်ရှိသည်။

ပဋိပက္ခများသည် အသက်အန္တရာယ်ထိခိုက်ခြင်း၊ သေဆုံးခြင်း၊ နာကျင်ခြင်း၊ ငတ်မွတ်ခြင်းနှင့် စိတ်ပိုင်းဆိုင်ရာ ဖိစီးမှုများကို ဖြစ်စေသည်။

လောင်စာဆီများ လောင်ကျွမ်းမှုသည် ရာသီဥတုကပ်ဘေးကို ဖြစ်စေသည်။ တစ်ပြိုက်နက်တည်းတွင် သန့်ရှင်းသောလေ ရှူရှိုက်ခွင့်ကို ဆုံးရှုံးစေသည်။ အိမ်တွင်းနှင့် ပြင်ပ လေထုညစ်ညမ်းမှုကြောင့် ၅ စက္ကန့်တိုင်းတွင် အသက်တစ်ချောင်း ပျက်စီးဆုံးရှုံးစေသည်။

နိုင်ငံပေါင်း ၁၄၀ ၏ ဖွဲ့စည်းပုံအခြေခံဥပဒေတွင် ကျန်းမာရေးကို လူ့အခွင့်အရေးအဖြစ် အသိအမှတ်ပြုကြောင်း ကမ္ဘာ့ကျန်းမာရေးအဖွဲ့၊ အားလုံးကျန်းမာရေးအတွက် စီးပွားရေးရာကောင်စီက တွေ့ရှိခဲ့သည်။ သို့သော်လည်း နိုင်ငံများသည် ကျန်းမာရေး ဝန်ဆောင်မှုများကို လက်လှမ်းမီနိုင်ခွင့် ရှိစေရန်အတွက် ဥပဒေများကို လိုက်နာကျင့်သုံးခြင်း မရှိကြပေ။ ကမ္ဘာ့လူဦးရေ၏ ထက်ဝက်ကျော်ဖြစ်သော အနည်းဆုံး လူဦးရေ ၄.၅ ဘီလီယံသည် ၂၀၂၁ ခုနှစ်တွင် မရှိမဖြစ်လိုအပ်သော ကျန်းမာရေးဝန်ဆောင်မှုများကို အပြည့်အဝ မရရှိကြောင်းအချက်က ၎င်းကို သက်သေထောက်ပြလျက်ရှိသည်။

ထိုစိန်ခေါ်မှုများကို ကိုင်တွယ်ဖြေရှင်းရန်အတွက် ၂၀၂၄ ခုနှစ်၊ ကမ္ဘာ့ကျန်းမာရေးနေ့အတွက် ဆောင်ပုဒ်မှာ “မိမိကျန်းမာရေး၊ မိမိအခွင့်အရေး” “My health, my right” ဖြစ်သည်။

အရည်အသွေးပြည့်ဝသော ကျန်းမာရေးဝန်ဆောင်မှုများ၊ ပညာရေးနှင့် သတင်းအချက် အလက်များ၊ ဘေးကင်းသော သောက်သုံးရေ၊ လေကောင်းလေသန့်၊ အာဟာရပြည့်ဝမှု၊ အရည်အသွေးကောင်းမွန်သော အိမ်ရာများ၊ သင့်လျော်သော လုပ်ငန်းခွင်နှင့် ပတ်ဝန်းကျင်အခြေအနေများနှင့် ခွဲခြားဆက်ဆံခြင်းမှ လွတ်မြောက်ခြင်းတို့ကို နေရာတိုင်းတွင် လူသားတိုင်းရနိုင်သော အခွင့်အရေးဖြစ်စေရန်အတွက် ယခုနှစ်၏ ဆောင်ပုဒ်ကို ရည်ရွယ်ရွေးချယ်ထားခြင်းဖြစ်ပါသည်။

🔴 လူထုအတွက် အဓိကသတင်းစကားများ

🔑 သင့်၏ ကျန်းမာရေးဆိုင်ရာအခွင့်အရေးများကို သိရှိပါစေ။

– သင့်တွင်
✅ ခွဲခြားဆက်ဆံမှု မရှိဘဲ လုံခြုံစိတ်ချရပြီး အရည်အသွေးပြည့်ဝသော ကျန်းမာရေးစောင့်ရှောက်မှုကို ရရှိပိုင်ခွင့် ရှိသည်၊
✅ သင်၏ ကျန်းမာရေးဆိုင်ရာ သတင်းအချက်အလက်များနှင့်ပတ်သက်၍ မပေါက်ကြားအောင် လျှို့ဝှက်ထားရှိပိုင်ခွင့် ရှိသည်၊
✅ သင်၏ ရောဂါကုသမှုနှင့်ပတ်သက်၍ သတင်းအချက်အလက် ရရှိပိုင်ခွင့်နှင့် သင်၏ သေချာနားလည် သိရှိ၍ သဘောတူခွင့်ပြုချက်ကို ရယူပိုင်ခွင့် ရှိသည်၊
✅ ဂုဏ်သိက္ခာရှိစွာ ကိုယ့်ခနွာကိုယ် ပိုင်ဆိုင်ခွင့်နှင့် ကိုယ်ပိုင်ဆုံးဖြတ်ပိုင်ခွင့် ရှိသည်။

🔑 သင့် ကျန်းမာရေးနှင့် ပတ်သက်၍ သင်ကိုယ်တိုင် ဆုံးဖြတ်ချက်ချပါ။

🔑 ကျန်းမာရေးသည် အခြေခံလူ့အခွင့်အရေးတစ်ရပ်အဖြစ် သင်၏ ကျန်းမာရေးအခွင့်အရေးကို ကာကွယ်ပါ။

– လူတိုင်း မိမိတို့ လိုအပ်သည့်အချိန်၊ လိုအပ်သည့် နေရာတွင် ငွေကြေးအခက်အခဲ မကြုံတွေ့ရဘဲ ကျန်းမာရေးဝန်ဆောင်မှုများကို လက်လှမ်းမီ ရရှိရမည်။

🔑 လူ့အခွင့်အရေးကို ပိုမို ကျယ်ပြန့်စွာ လွှမ်းခြုံနိုင်စေရန် အရေးကြီးသော ပင်ကိုယ်မူလ ထောက်တိုင်တစ်ခုအနေဖြင့် ကျန်းမာရေးအခွင့်အရေးကို မြှင့်တင်ပါ။

– ကျွန်ုပ်တို့၏ ကျန်းမာရေးအခွင့်အရေးကို လေးစားခြင်းသည် လုံခြုံဘေးကင်းသော သောက်သုံးရေကို လက်လှမ်းမီ ရရှိပိုင်ခွင့်၊ သန့်ရှင်းသော လေကို ရရှိပိုင်ခွင့်၊ အစားအစာနှင့် အာဟာရပြည့်ဝမှုကို ရရှိပိုင်ခွင့်၊ အရည်အသွေးကောင်းမွန်သော နေရာထိုင်ခင်း/ အိမ်ရာကို ရရှိပိုင်ခွင့်၊ ကောင်းမွန်သော လုပ်ငန်းခွင်အခြေအနေများကို ရရှိပိုင်ခွင့် နှင့် အကြမ်းဖက်မှုနှင့် ခွဲခြားဆက်ဆံခြင်းများမှ ကင်းဝေးနိုင်ခွင့် စသည့် အခွင့်အရေးများကို လေးစားခြင်းပင်ဖြစ်သည်။

🔑 ကျန်းမာရေးကို ဦးစားပေးဖြစ်အောင် ထောက်ခံပါ၊ ခုခံကာကွယ်ပါ။ ကျန်းမာရေးနှင့် ပတ်သက်၍ ဆုံးဖြတ်ချက်ချရာတွင် ပါဝင်ပါ။

ကျန်းမာရေးဝန်ကြီးဌာန၊ အမျိုးသားညီညွတ်ရေးအစိုးရ

Source:
https://www.who.int/campaigns/world-health-day/2024

#nugmoh #WorldHealthDay #WorldHealthDay2024 #MyHealthMyRight

ကျန်းမာရေးဝန်ကြီးဌာန၊
အမျိုးသားညီညွတ်ရေးအစိုးရ

Published on: April 7, 2024
Last updated: April 7, 2024