"ဩစတေးလျနိုင်ငံ၊ ပြည်ထောင်စုလွှတ်တော် တာဝန်ရှိသူများ၊ Senator များ၊ ပါလီမန်အဖွဲ့ဝင်များ၊ နိုင်ငံရေးပါတီခေါင်းဆောင်များ၊ လူမှုအဖွဲ့အစည်းများနှင့် ဒေါက်တာဇော်ဝေစိုး တွေ့ဆုံ" (Dr. Zaw Wai Soe Meets with Senators, Political Party Leaders and INGOs in Australia) (September 2023)

၂၀၂၃ ခုနှစ်၊ စက်တင်ဘာလ (၁၅) ရက်

ဩစတေးလျနိုင်ငံသို့ ရောက်ရှိနေသည့် အမျိုးသားညီညွတ်ရေးအစိုးရ၊ ကျန်းမာရေးဝန်ကြီးဌာနနှင့် ပညာရေးဝန်ကြီးဌာန၊ ပြည်ထောင်စုဝန်ကြီး ပါမောက္ခဒေါက်တာဇော်ဝေစိုးသည် ဩစတေးလျနိုင်ငံ၊ ပြည်ထောင်စုလွှတ်တော်ရှိ Australian Greens Party ၏ နိုင်ငံခြားရေးပြောရေးဆိုခွင့်ရှိသူ Senator Jordan Steele-John နှင့် (၄-၉-၂၀၂၃) ရက်နေ့တွင်လည်းကောင်း၊ လစ်ဘရယ်ပါတီ၏ Shadow Foreign Affairs Minister ဖြစ်သူ Senator Simon Birmingham နှင့် (၆-၉-၂၀၂၃) နေ့တွင် လည်းကောင်း၊ Shadow Assistant Education Minister ဖြစ်သူ the Hon Nola Marino MP နှင့် (၇-၉-၂၀၂၃) ရက်နေ့တွင်လည်းကောင်း တွေ့ဆုံကာ NUG ကျန်းမာရေးဝန်ကြီးဌာနနှင့် ပညာရေးဝန်ကြီးဌာနတို့က ဆောင်ရွက်လျက်ရှိသည့် လုပ်ငန်းများအကြောင်းကို အသိပေးခဲ့ပြီး ဆက်လက်ဆောင်ရွက်ရန်ရှိသည့် လုပ်ငန်းများအတွက် ဩစတေးလျနိုင်ငံ အနေဖြင့် ကူညီထောက်ပံ့ပေးနိုင်မည့် ကဏ္ဍများအပေါ် ရင်းနှီးပွင့်လင်းစွာ ဆွေးနွေးခဲ့ပါသည်။

ထို့အပြင် ဩစတေးလျနိုင်ငံရှိ အပြည်ပြည်ဆိုင်ရာ အစိုးရမဟုတ်သော အဖွဲ့အစည်း (INGO) များ၏ ဦးဆောင်အဖွဲ့အစည်းဖြစ်သည့် Australian Council for International Development (ACFID) ၏ CEO Mr. Marc Purcell နှင့်အဖွဲ့အား (၅-၉-၂၀၂၃) ရက်နေ့တွင် ACFID ရုံး အစည်းအဝေးခန်းမတွင် တွေ့ဆုံခဲ့ပြီး ဩစတေးလျ INGO များအနေဖြင့် မြန်မာလူထုအတွက် ပိုမိုထိရောက်စွာ ဆောင်ရွက်နိုင်ရေးအတွက် အမြင်ချင်း ဖလှယ်ခဲ့ကြပါသည်။ အထက်ပါ တွေ့ဆုံဆွေးနွေးပွဲများတွင် ပြည်ထောင်စုဝန်ကြီးနှင့်အတူ အမျိုးသားညီညွတ်ရေးအစိုးရ၏ ဩစတေးလျနိုင်ငံဆိုင်ရာ ကိုယ်စားလှယ်ဖြစ်သူ ဒေါက်တာထွန်းအောင်ရွှေလည်း တက်ရောက်ခဲ့ကြောင်း သိရှိရပါသည်။

Ministry of Health,
National Unity Government.