ဘဝအမောတွေ ခဏတာ ပြေစေဖို့ တယ်လီကျန်းမာ အလွွဲများ

အလွဲလေးတွေ ဟာသလေးတွေဆိုတာ လူတိုင်းကြုံဖူးကြမှာပါ။ ဆေးရုံဆေးခန်းတွေမှာ ဆရာဝန်/လူနာ အလွဲဟာသလေးတွေ ရှိတတ်သလို အခုလို အွန်လိုင်းကနေ အခမဲ့ကုသပေးချိန်မှာလည်း အလွဲလေးတွေကနေ ပြေးလို့မလွတ်ခဲ့ပြန်ပါဘူး…

များသောအားဖြင့် စာစီစာရိုက်မှားတာ၊ အကောင့်တွေမှားတာမျိုးဆိုပေမယ့် တချို့ ထူးထူးဆန်းဆန်း အလွဲလေးတွေလည်း ရှိတတ်ပါတယ်။

တစ်ခါက တယ်လီကျန်းမာဆရာတစ်ယောက် ဂျူတီဝင်မလို့ ဘိုကင်ယူထားတဲ့လူနာစာရင်းကိုကြည့်တော့…

12:00 pm – ဒေါ်ခင်မြင့် / ညာဒူးနာ / ၆၇ နှစ်

12:30 pm – အောင်သူရ / ဖျား (၃) ရက် / ၂၄ နှစ်

1:00 pm – ကိုထွန်းအောင် / နို့ကောင်းကောင်းမစို့ / ၂၈ နှစ်….

အဲ့ဒီမှာ…. ဟာ…

ကိုထွန်းအောင် နို့ကောင်းကောင်း မစို့တဲ့ကိစ္စက ဘာကြီးတုန်းပေါ့

လူနာရောက်လာတဲ့အခါ သေချာမေးကြည့်တော့မှ

” ကလေးက နို့ကောင်းကောင်းမစို့တာ ” လို့ ပြောချင်တာပါတဲ့။

( ကိုထွန်းအောင်က ကလေးအဖေပါ )

ကလေးလေးက ငယ်သေးလို့ အမည်ပေး ကင်ပွန်းတပ်တောင် မလုပ်ရသေးတာကြောင့် လူနာအမည်မှာ အဖေနာမည် ထည့်လိုက်တာပါ။

အဲ့ဒီတော့…ကိုထွန်းအောင် / နို့ကောင်းကောင်းမစို့ ကိစ္စတွေ ဖြစ်ကုန်တာပဲ။ တော်သေးတာပေါ့….. နို့မို့ဆို ဆရာဝန် ဗျာများရတော့မှာ

xxxxxxxxxxxxxxxxxxxxxxxxxxxxxxxxx

တစ်ကယ်တော့ တယ်လီကျန်းမာမှာ လူနာတစ်ဦးကို လူနာအမှတ် ( ID ) တစ်ခုပြုလုပ်ရပါတယ်။ တစ်ဦးချင်းစီရဲ့ ဆေးမှတ်တမ်းတွေကို Electronic Medical Record ( EMR ) လို့ ခေါ်တဲ့ ကွန်ပျူတာမှတ်တမ်းတင်စနစ်နဲ့ သေချာမှတ်သားထားပေးပါတယ်။

တချို့တွေက ဒါကိုမသိတော့

ကိုယ့်အမေ ( ဥပမာ…ဒေါ်ညို ) ဒူးနာလို့ ဆေးခန်းပြလည်း ဒီ ID… ကိုယ့်ကလေးဖျားလို့ ဆေးခန်းပြတော့လည်း ဒီ ID နဲ့ပဲ ပြန်လာပြတာမျိုးတွေ ရှိပါတယ်။

အဲဒီတော့ ဆေးမှတ်တမ်းထဲမှာ ဒေါ်ညိုဟာ ဒူးအတွက် ဆေးတွေသောက်လိုက်၊ ပါရာစီတမောဆေးရည်လေး 5 cc ကို ဇွန်းလေးနဲ့ သောက်လိုက်၊ ဖျားတဲ့အခါ ရေပတ်တိုက်လိုက်နဲ့ ဗရုတ်သုတ်ခတွေ ဖြစ်ကုန်တော့တာပါ။

ဒီလိုအခါမျိုးမှာ တယ်လီကျန်းမာဆရာဝန်တွေက လူနာကို ပြန်ဆက်သွယ်ပြီး ကလေးအတွက် ID အသစ်တစ်ခု ပြန်လုပ်ပေးလိုက်ကြပါတယ်