မေမေတို့ရေ…
အာဟာရဖွံ့ဖြိုးရေး ရက်သတ္တပတ်များကို ကျင်းပတဲ့ ဩဂုတ်လကို ရောက်ရှိလို့ လာခဲ့ပြန်ပါပြီ။
(၂၀၂၃) ခုနှစ်၊ အာဟာရဖွံ့ဖြိုးတိုးတက်ရေး ရက်သတ္တပတ်များရဲ့ ပထမပတ်ဖြစ်တဲ့ “ကမ္ဘာ့မိခင်နို့တိုက်ကျွေးရေးရက်သတ္တပတ်”အတွက် ဆောင်ပုဒ်ကတော့ “Let’s make breastfeeding and work, work!” ဖြစ်ပြီး၊ မြန်မာလို ဘာသာပြန်ရင်တော့ “လုပ်ငန်းခွင်မှာ နွေးထွေးစွာ နို့ချိုတိုက်ကာ အလုပ်လုပ်ပါ” ဖြစ်ပါတယ်။
ခေတ်မီဖွံ့ဖြိုး တိုးတက်လာတဲ့ ကမ္ဘာကြီးမှာ မေမေတွေဟာ နှောင်းခေတ်များတုန်းကလို အိမ်တွင်းအောင်းပြီး အိမ်အလုပ်တွေကိုသာ လုပ်ကိုင်နေကြတဲ့ အိမ်ရှင်မများ မဟုတ်ကြတော့ပါဘူး။ အိမ်ထောင်တာဝန်နဲ့ အိမ်မှုကိစ္စများကိုလည်း နိုင်နင်းစွာ တာဝန်ယူကြရတဲ့အပြင် ပြင်ပလုပ်ငန်းခွင် အလွှာအသီးသီးမှာလည်း အောင်မြင်စွာ တာဝန်ယူလုပ်ကိုင်နေကြတဲ့ အာဂမိန်းမသားများ ဖြစ်လာကြပါပြီ။
အဲဒီလို အာဂမေမေတွေအတွက် လုပ်ငန်းခွင်မှာ လုပ်ကိုင်နေရင်း မိမိရဲ့ ရင်သွေးလေးကိုပါ အချိန်မှန် မိခင်နို့တိုက်ကျွေးနိုင်ဖို့၊ ရင်အုပ်မကွာ ပြုစုစောင့်ရှောက်နိုင်စေဖို့အတွက် လုပ်ငန်းရှင်များနဲ့ ပြည်သူလူထုက ပံ့ပိုးမှု၊ သတိပြုမှု မြင့်တက်လာအောင် ရည်ရွယ်ပြီး ယခုနှစ် ကမ္ဘာမိခင်နို့တိုက်ကျွေးရေး ရက်သတ္တပတ်ရဲ့ ဆောင်ပုဒ်ကို သတ်မှတ်ထားခြင်း ဖြစ်ပါတယ်။
မိခင်လောင်းများနှင့် နို့တိုက်မိခင်များ လုပ်ငန်းခွင်၌ မိမိတို့၏ ရင်သွေးငယ်များကို အဆင်ပြေလွယ်ကူစွာ နို့ချိုတိုက်ကျွေးဖို့ရာ
မူဝါဒ ချမှတ်သူများအနေနှင့်
✧ လစာပြည့်ဖြင့် မီးဖွားခွင့်ကို အနည်းဆုံး ၁၈ ပတ် သို့မဟုတ် ၆ လနှင့်အထက် ပေးခြင်း
✧ လုပ်ငန်းခွင်၌ မိခင်နို့တိုက်ကျွေးရန် နားချိန် သီးသန့်ပေးခြင်း၊ မိခင်နို့ လွတ်လပ်စွာ တိုက်ကျွေးနိုင်ရန် သီးသန့်အခန်း သို့မဟုတ် နေရာများ ဖန်တီးပေးခြင်း
✧ မည်သည့်လုပ်ငန်းခွင်၌မဆို မိခင်များ၏ ရပိုင်ခွင့်များကို တန်းတူညီမျှ ရရှိအောင် ဖန်တီးပေးခြင်း
✧ ကိုယ်ဝန်ဆောင်ချိန်နှင့် မီးဖွားချိန်တို့တွင် လုပ်ငန်းခွင်ဆိုင်ရာ ခွဲခြားဆက်ဆံခြင်းများ လျော့နည်းအောင် လျှော့ချပေးခြင်းတို့နှင့် သက်ဆိုင်သည့် မူဝါဒများ ချမှတ်ခြင်းတို့ ဆောင်ရွက်ပေးနိုင်ပါသည်။
အလုပ်ရှင်များ၊ မန်နေဂျာများအနေနှင့်
✧ နိုင်ငံတော်က ချမှတ်ထားသည့်အတိုင်း မီးဖွားခွင့်ကို မိခင်လောင်းအားလုံး တန်းတူရရှိရန် ဆောင်ရွက်ပေးခြင်း
✧ လုပ်ငန်းခွင်ရှိ မိခင်များ နို့တိုက်ကျွေးရန် နေရာများနှင့် မိခင်နို့သိုလှောင်ရန် နေရာများ ထားရှိစေခြင်း
✧ ရင်သွေးငယ်ကို မိခင်နှင့် ရင်အုပ်မကွာ စောင့်ရှောက်နိုင်ရန် မီးဖွားခွင့်အပြင် သင့်တော်သော အလုပ်ချိန်သတ်မှတ်ပေးခြင်း၊ ကလေး ပြုစုစောင့်ရှောက်ရန် နေရာများ ဖန်တီးပေးခြင်း၊ အိမ်မှ အလုပ်လုပ်စေခြင်း၊ အချိန်ပိုင်း အလုပ်လုပ်စေခြင်းနှင့် ကလေးအား လုပ်ငန်းခွင်သို့ ခေါ်ဆောင်လာကာ စောင့်ရှောက်ခွင့်ပြုခြင်းတို့ ဆောင်ရွက်ပေးနိုင်သည်။
လုပ်ဖော်ကိုင်ဖက်များအနေနှင့်
✧ မိခင်လောင်းများ လုပ်ငန်းခွင်သို့ ပြန်လည်ဝင်ရောက်သောအခါ အားပေးကူညီခြင်း၊ သင့်တင့်သော အလုပ်အချိန်ဇယားများ ညှိနှိုင်းပေးခြင်း
✧ လုပ်ငန်းခွင်တွင် အမျိုးသမီးအခွင့်အရေးကို ကာကွယ်ပေးခြင်းတို့ ဆောင်ရွက်ပေးနိုင်ပါသည်။
ကျန်းမာရေးဝန်ကြီးဌာန၊ အမျိုးသားညီညွတ်ရေးအစိုးရ
(ဩဂုတ်လ၊ ၂၀၂၃ ခုနှစ်)
Ministry of Health,
National Unity Government.
Reference:
https://www.who.int/campaigns/world-breastfeeding-week/2023/key-messages
#nugmoh #breastfeed #breastfeeding #worldbreastfeedingweek #worldbreastfeedingweek2023
Published on: 6 August 2023
Last updated: 6 August 2023