World Food Day, 2022- ကမ္ဘာ့စားနပ်ရိက္ခာနေ့ (16 October 2022)

ကမ္ဘာ့စားနပ်ရိက္ခာနေ့ – World Food Day, 2022 (16 October 2022)

မည်သူတစ်ဦးတစ်ယောက်မျှ နောက်မချန်ခဲ့စေရ
Leave no one behind

🍍 လူတို့သည် နေ့စဉ် လှုပ်ရှားသွားလာခြင်း၊ လုပ်ငန်းတာဝန်များထမ်းဆောင်ခြင်းအပြင် ခန္ဓာကိုယ်အတွင်း အလိုအလျောက် ဆောင်ရွက်နေသောဖြစ်စဉ်များ (အသက်ရှူခြင်း၊ အစာခြေဖျက်ခြင်း၊ အပူအအေးထိန်းညှိခြင်း) အားလုံး စဉ်ဆက်မပြတ် ဆောင်ရွက်နိုင်ရန် စွမ်းအင်လိုအပ်ပါသည်။ အဆိုပါ စွမ်းအင်ကို အစာအာဟာရ၊ အစားအစာ စားသုံးခြင်းမှ ရရှိပါသည်။

🍍 ထိုသို့ အသက်ရှင်ရပ်တည်ရေးအတွက် အရေးပါလှသော အစားအစာကို စားသုံးရာတွင် ကျန်းမာရေးနှင့်ညီညွတ်သော၊ သန့်ရှင်းလတ်ဆတ်သော၊ မိမိတို့အရပ်ဒေသတွင် အလွယ်တကူရရှိနိုင်၍ ပေါများသော အစားအစာများကို အစာအုပ်စု စုံလင်မျှတစွာပါရှိအောင် ရွေးချယ်စားသောက်တတ်ရန် အရေးကြီးပါသည်။

🍍 “တန်ဆေး၊ လွန်ဘေး” ဆိုသကဲ့သို့ သင့်တင့်သော ပမာဏပြည့်မီအောင် မစားသုံးလျှင် အားအင်ချည့်နဲ့ခြင်း၊ အာဟာရချို့တဲ့ခြင်း၊ ရောဂါဝင်လွယ်ခြင်း စသော ဆိုးကျိုးများရှိသလို စားသုံးမှု လွန်ကဲ (မမျှတ) ပါကလည်း အဝလွန်ခြင်း၊ သွေးတိုး၊ ဆီးချို အစရှိသော မကူးစက်တတ်သော နာတာရှည်ရောဂါများ ဝင်ရောက်လာနိုင်ပါသည်။

🍍 ပဋိပက္ခများဖြစ်ပွားခြင်း၊ ကမ္ဘာကြီးပူနွေးလာခြင်း၊ စားသောက်ကုန်ဈေးနှုန်းများ မြင့်တက်လာခြင်း၊ သာတူညီမျှမှုမရှိခြင်း၊ ကပ်ရောဂါများဖြစ်ပွားခြင်းတို့သည် မည်သည့်နိုင်ငံတွင်မဆို ဖွံ့ဖြိုးတိုးတက်မှုများကို အဟန့်အတားဖြစ်စေပါသည်။

🍍 မြန်မာနိုင်ငံတွင် အဆိုပါ ဘေးအန္တရာယ်ဆိုးများအပြင် စစ်ဘေးဒုက္ခကိုပါ အပြင်းအထန် ခံစားနေကြရသည်ဖြစ်ရာ ပြည်သူတို့မှာ မိမိတို့ အိုးအိမ်ကို စွန့်ခွာပြေးရခြင်း၊ ကုန်ဈေးနှုန်းများ မြင့်တက်ခြင်းတို့ကြောင့် စားနပ်ရိက္ခာ လုံလောက်စွာ မစားသုံးရသည့် မိသားစုများ၊ ငတ်မွတ်ခေါင်းပါး၍ အာဟာရပြတ်သော လူဦးရေများ တိုးပွားလာလျက်ရှိပါသည်။

🍍 ရေရှည်တည်တံ့သော ဖွံ့ဖြိုးသည့် နိုင်ငံတစ်နိုင်ငံဖြစ်စေရန် သာတူညီမျှမှုရှိရန် လိုအပ်ပါသည်။
တောင်သူများ၊ အစားအစာထုတ်လုပ်သူများ၊ စားသုံးသူများအားလုံးကို သာတူညီမျှ အခွင့်အရေးရရှိစေမည့် အခွင့်အလမ်းများ ဖန်တီးပေးရပါမည်။

🍍 မိမိတို့ ပတ်ဝန်းကျင်ကိုလည်း အစဉ် သန့်ရှင်း၊ စိမ်းလန်းနေစေရန် လူတိုင်းပါဝင်ကြရပါမည်။

🍍 ဆင်းရဲဒုက္ခများ၏ အရင်းအမြစ်ဖြစ်သော အာဏာရှင်တော်လှန်ရေးတွင်လည်း မိမိတို့ ကျရာနေရာမှ တတ်အားသရွေ့ပါဝင်ရင်း ယခုကာလတွင် ရေများသော အိုးများကို ထပ်ခါ ထပ်ခါဖြည့်တင်းကာ ကုသိုလ်ပြုကြမည့်အစား စစ်ဘေးရှောင်ဒေသရှိ ပြည်သူများ၊ မိမိတို့ပတ်ဝန်းကျင်ရှိ အဆင်ပြေသူများမှ ခက်ခဲသူများ၊ အဆင်မပြေသူများကို ပြည်သူမှပြည်သူသို့ ကူညီပေးကာ လူတိုင်းအာဟာရပြည့်သော အစားအစာများ လက်လှမ်းမီရရှိစေရန် ပါဝင်ပေးစေလိုကြောင်း တိုက်တွန်းလိုက်ရပါသည်။

Reference:
1) https://www.fao.org/world-food-day/en/
2) The Science of Nutrition by Rhiannon Lambert

Ministry of Health,

National Unity Government.

Published on: 16 October 2022
Last Updated: 16 October 2022